آه .. يا دُنيا !! (بقلم: د. إيمان عصفور- مصر)

كفاية جرى ورانا يا دنيا..

مش لاحقين ناخد نفسنا..

كبرنا قبل أواننا .. تعبنا..

عاوزين فرحة ترمم جروحنا..

عاوزين ضحكة تجلجل قلوبنا..

كافحنا.. شقينا.. طب ريّحينا..

شبعنا هموم.. امتى هتزول الغيوم؟

مبقاش طاقة للجدل ولا حتى قدرة للزعل..

يااااما سامحنا واتغاضينا.. طب ارحمينا..

نفسنا في طاقة سرور تنفتح لنا.. تشرح صدورنا.. تعوضنا.. تريحنا.. تهنينا .. معدش باقي كتير.. ده العمر بيعدي.. والدنيا رافضة تهدي خطاويها.. وبتجري..

يا ترى هايجي الفرح ولا لسة بعيد؟

مش هانفقد الأمل طول ما في سعي وعمل.. وفي نفس نتنفسه كل يوم جديد.. يوهبه لنا ربنا رب القلوب الرحيم المجيد.. وطول ما في ناس تشبهنا وتقوينا.. وتثبت خطاوينا تمسح دموعنا وتداوينا.. يبقى فيه أمل.