بنقسى ساعات !! (الشاعر فهمي علي- مصر)

تُدومي يا خضرة ولَّادة

وجوّاكي كلام يتقال

وحلوة تملِّي كالعادة

ولو تُهتي ليالي طوال

حبيبتي هيَّ دي الدنيا

بتقسىٰ ساعات على الحِلوين

نشُوفهم وقتها قَسوة

وبيصبُّوا ف قلوبنا أنين

وفجأة يرجعوا لينا

ويسقُونا الحنان بحنان

بحُضن كبير يكفِّينا

يدفِّينا بكان ياما كان

وبِحكاوي كانت دايما

على قلوبنا بتِطرَح خير

نقوم نِدعي لأحبابنا

وأصحاب كانوا كالأساطير

بحَق نبينا هتعودي

وتِملينا فَرَح وأمان

يِجَلجِل فِ الوِدان صوتِك

نِهلِّل عيدي… زيّ زمان

هنمسَح مِ الدموع عينِك

وهنعينك على الِّلي سار

وييجي الصُبح من تاني

معاه فَجرِك وألف نهار