إنما إيه؟ أورجانيك !! (بقلم: منى فؤاد- مصر)

في مسلسل لعبة نيوتن سمعنا كلمة يمكن أغلب الناس مسمعتش عنها قبل كده.. لما بدر أخد حازم المزرعة بتاعته وقاله: إن كل الزراعات اللي في المزرعة دي أورجانيك!!

  ناس كتير استغربت الكلمة، وناس مسمعتهاش أصلا، وناس مفهمتش معناها؛ مش لأنها صعبة في ترجمتها؛ لكنها جديدة في معناها، وطلعك كوميكس كوميدي فيها صورة بدر وهو بيقول مصيبة وبعدها إنما إيه ؟ أورجانيك؛ يعني طبيعية؛ مصيبة من غير مدخلات صناعية مصيبة علي ابوها يعني.. مثلا يقولك:
*الواحد اتصدم شوية صدمات؛ إنما إيه ؟ أورجانيك
*فلْسنا شوية إفلاس؛ إنما إيه؟ أورجانيك
* الواحد شاف سواد أيام؛ انما ايه؟ أورجانيك

شعبنا اللطيف لما بتعلق كلمة في دماغه بيعمل عليها نكت ولزمات كوميدية بس الكلمة دي علقت معايا أنا شخصيًا خلتني عملت سيرش علي معنى الكلمة وعرفت أن أورجانيك تعني الأطعمة العضوية المنتجة بأساليب لا تتضمن مدخلات صناعية مستحدثة غير طبيعية، من مبيدات حشرية صناعية وسماد كيماوي، وخلال إنتاجها لا يتم تعديلها بالتعرض للإشعاع أو بالمذيبات الصناعية أو بالمضافات الكيماوية.

لقيت أن بدر ده دماغ عالية منفصلة عن العالم الخارجي.
يعني ايه يعمل زراعات خالية من أي مصيبة سودا تضر بجسم الإنسان ؟
افتكرت لما كنت بروح سوبر ماركت كبير والاقي في قسم الخضراوات ركن فيه بعض الخضراوات المغلفة بشكل مُغري جدا ومكتوب عليها أورجانيك، وكنت ابص علي السعر الاقي طبق الخيار فيه 6 خيارات بـ 45 جنيها؛ وطبق الفلفل الألوان فيه 3 فلفلات بالعدد بـ 27 جنيها؛ كنت اتخض وامشي وانسى الموضوع.

تخيلوا لما كيلو خيار بـ 45 جنيها؛ ده انا لو اشتريته هعلقه في النجفة، ورايحة جاية ابوس فيه واطبطب عليه وأجيب أصحابي يتفرجوا واللي هيمد إيده عليه هقطعهاله.

ده الحق الطبيعي لمواطن يعيش في بلد زراعي أصلا ربنا اداله أرض خصبة، ولكن التدخلات البشرية افسدت الطبيعة.

بقالنا عقود من الزمن بناكل وبنأكل أولادنا سموم مرشوشة ومحطوطلها سماد كيماوي ومعرضة اللأشعاع، وسألت نفسي: هو صعب أوي أن إحنا نعمل زراعات طبيعية عضوية “اورجانيك”؟

علشان تطلع أجيال بدون سرطانات وفيروسات كبدية ومصائب صحية؟
هو الموضوع صعب أن دي تبقى ثقافة حكومة إنها تأكل شعبها أكل طبيعي صحي؟
بتخيل أو بتمنى أن ده يكون توجه الدولة في الوقت القادم.. لكن هناشد رئيس الجمهورية انه يهتم بصحة المواطن ومش بأنشاء مستشفيات ومصانع أدوية؛ لكن بنظامه الغذائي الصحي اللي هيغنينا وراء اللهث في بناء مستشفى كل 48 ساعة.

ابدأ بصحة الإنسان ياريس حتى يصح عقله؛ فالعقل السليم في الجسم السليم
علشان نبقى شعب إنما إيه ؟ أورجانيك.

بقلم/ منى فؤاد- مصر