بتكتبلي!!!
جميل جداً…
يمكن… كلمتين منك
يداووا جرح في جراحي
بتكتبلي!!
يمكن.. كلمة على كلمة
تجري دموعي فيرتاحوا
بتكتبلي!…
حاجة تخصني بالذات!
أحس فيها قيمة الذات
تتولد جوايا بنات…
تحسسني بتكويني
بقولك إيه… ما تكتبلي
قصيدة طويلة….
تحكيني..
تسعدني… تبكيني
ما تكتبلي..
عن نفسي..
أنا عمري ماحد كتبلي
بيت م الشعر يوصفني!
تصدقني!!
مع إني بموت في الشعر
وحابسني
في بيوته وشطراته
مغرقني
ف بحوره وقافياته
هتكتبلي… اكتبلي
كلام زيك..
يشبهني…
عفيف.. طايش
جرئ.. خايف
خجول.. لكن!
هواه جارف
ياريتك يوم تكتبلي
تقول إني
أنا القلب اللى عاش بالحب
وأنا القلب اللى عمره ما حب!
وكان حلمه إنه يتحب
حب كبير مش عادي
لكن… عادي!
بيكتب شعر ع النظرة
ونبشها في القلب
ع الضحكة اللى تزرع ورد
ع الرقة اللي تسبي الروح
و ترجع لحضن المهد
ويكتب في الفراق أشعار
و ينزف م الحنين أنهار
و يلمس لهفة المشتاق
و يبقى رواية للعشاق
مع إنه.. عمره ما حب!
غريب هوه دا القلب!
يااااه..
دأنا نفسي..
أعيش اللحظة
قبل ما أموت…
أغني.. وأقول
بملو الصوت..
كفاية سكوت
و اكتبلي
وإن فات العمر
و ده ماحصلش
ما تتأثرش!
هموت يعني !!!
و إيه يعني !!!
حاجة من الحاجات
اللي اعرفه من نفسي
ومابتحصلش
يا عم بس ما تكسلش
و من تاني اكتبلي
واكتبلي
