جايز !! (الشاعر فهمي علي- مصر)

وكُنت زمان با خاف مني

فَ باعمل عَكس ما انا عايز

أسلِّم عَ الِّلي مش عارفُه

واقول عَ المستحيل جايز

صحابي كُنت باعشقهم

واداري عَنُّهُم حُبي

وناسي كنت بَكتِبهُم

واسيب ما كتبت مِتخبِّي

لِحَد ايامي ما خانِتني

وخَلِّتني أحِب وادوب

وفجأة لقيتني باتمني

اراجِع نَفسي تاني واتوب

ما انا غلطان أوي ف حَقي

وسِيبت الحَبل عَ الغارِب

لقيت تعابين مَلِت شَقِّي

ورغم العَطف باتحارِب