يا عَم الجُونة مَفتوحة
وبترَحَّب بمِيت بَلبُوص
عَرايا مَلط إيه يَعني
بلاش تِعمِلِّي واد خَلبُوص
ما كلُّه ضَم علىٰ كلُّه
وبالأحضَان وهَرس وبُوس
هَتيجي إنتَ تِتفَزْلِك
يا عَم ارحَمنا مِن دَا كابُوس
دي ناس يا عَمِّنا رايقة
ومَوْضُوعهُم كلام في كلام
وحَبِّة رقص بالويسكي
وخُد مِيت حُضن لاجْل تنام
بلاش الحِقد لا مُؤاخذة
يا فاكرين انُّكُم عايشين
طَب احكِيلي عن السَّهرة
ومين بِيْبَعزَق الملايين
وقولِّلي ازاي سَحَب سوسو
وقَفَل الباب عَشان ما يعيش
وجُوزها الحِلو بسلامتُه
يقولَّك عَ الكرامة مَفيش
ليالي حَمرا علىٰ صَفرا
وناس مش زيِّنا تايهين
وفِ الحِلم الِّلي كَيِّفْهُم
وماشي كِيف ما هُم ماشْيِّين
وبيبعُوا الفُجور لِينا
ونِبقىٰ سعرانين شَاريِّين
وبِنسَقَّف وبِنهَيَّص
عَشان بِيعَلِّمُونا دين
وناسْيِّين ان فِيه آخرة
وفِيه مَتاعِيس وفِيه فَايْزِين
أمان الله علىٰ عَرضي
وعلىٰ عَرضَك وعَ الطَّاهرين
وعلىٰ كل مِتْبرَّأ
من الحاصِل.. فَقولوا آمين
