طبطب علينا يا رب !! (الشاعر فهمي علي- مصر)

صباح الخير علىٰ أهلي

وعَ الناس الِّلي نِسيُوني

صباح من قلبي بِيْسَلِّم

ويرسِم ضِحكة فِ عيوني

علىٰ حَبايبي ورُوح رُوحي

ونَبض تَملِّي سَاكِنني

باقولُه بالصَّفا وراضي

وعِندًا فِ الِّلي عَكنِنِّي

بريحِة الفُل مِتعَطَّر

وشايل بَسمة فيها حَنان

وبُوسَة للخُدود قاصدة

تِصالِح حَد كان زعلان

تِجيب مِيت هَمسَة للخايف

فايتْطَّمن… يعيش مَبسوط

عشان قلبي بِيعشَقكُم

وبَحر العِشق كلُّه شطُوط

هاقول يا رب… قولوا آمين

يِسَهِّل كل صَعب عَسير

ويهدي قلوبنا ويطَبطَب

علينا نِبقىٰ فجأة بخير.