دائمًا مهما كان مَن تحبيه وتزوجتيه، تجده إحداهن جديرًا بالاهتمام، والأسباب معروفة إما أنه صاحب منصب مهم، أو ثراء فاحش، أو لديه سذاجة الاعتقاد بأنه “الواد الجامد المهم الأهم الفظيع” !!
وهى إما لديها طموح تريد اختصاره أو في حاجة إلى زواج عاجل لتجنب تمييز مجتمعي.. وعلشان عيب يتكتب علي قبرها (ماتت الآنسة فلانة)!! وكأنه عار ..أو لأنها حقودة بعيد عنك وعن السامعين.. يعنى ليه انتى تحظي بعلاقات دافئة جيدة وهى No ويهيأ لها أنها الأجمل والأحلى والأحق.
فهى- من وجهة نظرها- البت الأنثي الفشيخة، اللي مافيش منها اتنين تستطيع أن تستحوذ علي قلب الراجل اللى بيحب مراته أوي وتخطفه من أولاده وزوجته عادي كدا بدافع الحب و”العواتيف”.. التى وقع فيها العاشقان غصب عنهما يا حرام ولا تشك لحظة في أنها الأجمل من زوجته والأحن من أمه والأطيب من أبنائه.
هي تعشقه لا لشيء إلا لأنها تشعر به من الداخل ليس من أجل شكله أو أمواله أو منصبه هو دخل قلبها كدا فجأة دون مقدمات ..يا قلب أمك.. وهنا البطل يشعر بقي أنه لسه بيقول ولسه الأماني ممكنه ده حتى الشرع اللى هو الشرع محلله أربعة تيجى انتي يا مراته يا غلبانه تقوليله أنا وبس ؟؟ !!
يعنى علشان كنتي جنبه، واستحملتي مشاكله وبدايته، وربيتيله ولاده كويس ودبرتي حاله واستحملتي تقلباته وداويتيه في المرض، وسندتيه في الحزن وساعدتيه في النجاح وجعلك الله سببًا من أسباب توفيقه ولميتي قرشك من ورث أبوكي علي ورثه علشان تعملي أسرة ناجحه وتهيأي ظروف أفضل لمزيد من النجاح وشيلتي همه ودعيتي ربنا يخف ألمه.. تستحوذي عليه بلغة نور الشريف شقى عمران يا جدعان
أبسلوتلي.. لاء سيبي الراجل المتفرغ لذاته يعيش بقي لاذاته هههه.. ثم إن صحبته دائما منتعشة دائما محتجاله، صوتها واطى قلبها دافئ، دموعها قريبة إبداعتها خلابة مشاعرها فياضة، حروف كلمات عشقها ولادة ..وبعدين انتي أخدتي كتير يا حاجّة وهى عاوزة بس اللى فاضل ده في الأول طبعا بعد كدا الأمورة حتنطق في كل شيء وتستحوذ بقى ويكون الفار وقع في المصيدة والست اتطلقت والعيال اتشردت وما فضلش لك غيرها يا عسل 😀
وتكتشف أن طنط اللي بتحبك للحب مصلحجية أو حقودة عليك وعلي اللى جابوك ..وتتفاجأ بأن بوثي ملاك الرحمة طلعت بنت ستين … وان مرضك مُزعج وشغلك متعب وفلوسك بتاخد منها الفاضل ليه وإن وإن وإن ..إلخ
تيجي ترجع للصدر الحنين تلاقيه نشف.. تكمل مع السنيورة تلاقيها قلبت غجورة ..وتكتشف بعد ما الفاس تقع في الرأس إنها مش غادة عبد الرازق نو ابسلوتلي no دي عبد الرازق نفسه وهو أحلى منها كمان.. والشعر الهندم يقلب كنيش واللبس المكوى يقلب ملاية لف.
وعلشان العقل يسبق الاحتياج عند بعضهن المصلحجية تقولك لاء مش عاوزة جواز علشان خاطر ولادك ..خلينا كدا مع بعض في الحرام ومدام ما بيتقفلش علينا باب يبقي احنا كدا في السليم يا معلم 😂😂
انت تعيش اللحظة، وهى تستفيد من اللقطة واهو نص العمى ولا العمى كله، وكفاية أن فيه مغفلة شيلاك كنس ومسح وطبيخ وتربية وولادك حوليك يا أصيل ..وبره بقي القلب وما يريد تخرج مع مراتك تتلفلنك علي رأي اخوتنا اللبنانيين علشان رمش عينيها اليمين وقع بس عالخد الشمال أهو علشان ما تركزش مع مراتك بالمرة وتعكنن عليكم وانتى عاوز تسيب الدكتور بتاع البنت علشان تلحق الرمش.
وهى بتغير عليك لكن مراتك اعوذ بالله بتخنقك طيب اية الحل يا زوجة منك لها لها لها …اقولك خلي حلاوتك زيادة وأناقتك فوق العادة واعملي قهوة بن كتير سادة وركزي في حالك واهتمى بمالك أوعي تزعّلي عيالك وحتلاقي اللى باعك يشتريك بأغلي الغالي علشان انتي الأصل مش تيواني .. آه استني كده ثواني ..سيبه الحلو علي هواه علشان حيلف ويلف ويلف ويرجعلك تاني وان رجع يبقي الحب صادق ويستاهل المحاولة تاني ..وانتي بقي عزيزتي الصيادة روحي لامك 😂
