آه يا دنيا محيرانا
الفرح فيكِ ليه قليل
والحُزن فيكِ ليه براح؟
دايماً يا دنيا متوهانا
ولا فيكِ حد عاش مرتاح!
فيكِ ناس كتير مرفهة
والحُزن ساكن قلبها
وناس من كُتر غُلبها
كرهت حتى نفسها
واهي عيشة..!
ناس زعلانة إنها عايشه
وناس معدومة متعايشة!
وناس وحيدة بتدور تلاقي حبيب
وناس عذابها إنها عاشقة وما لها نصيب
وآدى ناس.. من الحَوْجة مقهورة
وغيرهم يبان عِزًهُ من الصورة
ولا حد عاجبه حاله ونفسه يبدله
لا الغني مبسوط ..
ولا اللي الفقر مِبَهدِلُه!
يا ناس العُمر ده قصير
لازم نرضى بقا بحالنا
ولا نزعل ولا نتحير
لأن الدنيا مش دايمة لنا
