الجنس الناعم
دينا رمزي تتساءل: هو صحيح الجواز بطيخة مقفولة ؟!
لاء الجواز مش بطيخة مقفولة خالص.. الجواز واضح جدا من الأول، بيتحدد هيكله بُناء على المقدمات .. (مقدمات منطقية تنتهي إلى نتائج منطقية).. ببساطة كدا كل حاجة بتكون واضحة من بداية أي علاقة، (إحنا بس اللي مش واخدين بالنا)، بسبب التسرع او نتغافل لأن بنبقى عايزين نتجوز وخلاص.
كثير من الرجالة بيبقى متخيل إن الست القوية المستغنية مش هتعمر بيت، والراجل مش هيقدر يمشِّي كلامه عليها.. والســـــــؤال هنا بيفرض نفسه: هل انت عايز واحدة تمشي كلامك عليها ولّا تتكلم معاها تفهمها وتفهمك؟
الست القوية عندها توزان يخليها ما تخافش وما تقلقش وتحس معاك بالأمان،لأنها مش قلقانة من ضعفها، ومن الزمن وهي معاك، بتركز أكتر ازاي تبقى سعيدة معاك.. مش همها تأمن نفسها من غدرك،لو ارتاحتوا سوا تعيشوا فى مودة، ولو ما رتحتوش تسيبوا بعض بإحسان.
مش تعادوا بعض في المحاكم، ومش بسبب الحب تأتي العداوة، ولكن من يفوز وقتها بالمكاسب المتاحة أكتر مثل البحث عن الشقة.. مين يطرد الثاني ومين يفضل.
الست القوية قادرة تدير الموقف، وتتفق وتختلف بالعقل، بس الحد الفاصل في أي علاقة هو الحب واحترامنا لبعض.
الســـــؤال المهم: بنتجوز ليه ؟
والرد يختلف ما بين الشباب والبنات!!
الإجابة عند أغلب الشباب؛ علشان واحدة تريحنى وتدلعني، يعني حضرتك طلعت نفسك من المسؤولية وعايزها تعاملك معاملة أطفال تهنّن وتتدلع، كأنها أمك وأكثر .. وهي لا خلفت قبل كدا ولا عيل طلع روحها.. هتدلعك ازاي !!
الإجابة دي غلط بترفع التوقعات من البنت بطريقة تعجيزية ويحصل إحباط وخناق، ولاقدر الله ممكن تؤدي إلى طلاق.
طيب الإجابة للسؤال بنتجوز ليه لأغلب البنات: عايزة واحد يدلعني، يدلعك ؟ هو لسه في السطر اللى فوق قايل أنا عايزها تدلعني برضو زى أمه أو أكثر، مين هيدلع ويهنن الثاني بقى !!
علشان كدا الإجابة دي كمان بترفع توقعات البنت من الولد جدا والرجالة مخنوقة على نفسها ومش فاضية تدلع !!
الإجابة النموذجية هنا؛ عايزين نتجوز علشان نعيش مع بعض، نطمن لبعض ونريح بعض وندلع بعض ونتخانق مع بعض ونصالح بعض ونشيل هم بعض وتخاف علي بعض ،الجواز رحلة ونس ودفا، مليانة حب ومودة، ومتاعب وترتيبات كتير .. صحة وعيا وفرح وزعل وزهق وخنقه وحب وعسل وخناق وبصل، يعني كل حاجة وعكسها أثناء تللك الرحلة.
نكون مستعدين ؟!!
من أول تفصيله في الحياة محتاجين نتعلم التعايش السلمي من غير الدخول في التفاصيل الصغيره، لازم نتعود ونتعامل مع بعض لو طبعنا مختلفه ونترك مساحه من الحريه في العلاقة ؟
نرجع لمعايير الاختيار..
البنات أغلبهم عايزة راجل جاهز بس النقطة هنا يعني إيه جاهز ؟ أو جاهز ازاي؟
عنده شقة وعربية، كدا جاهز !!
واللا دماغه جاهزة تقبل دماغك، جاهزة لفهم يعني إيه مسؤولية واحترام الست اللي معاه بينهم وقدام الناس.. الشقة والعربية مهمين وحلوين بس مش هو ده الأساسيات
الأساسي هو جاهز ازاي.. ودا السؤال الأهم:
طيب انتي جاهزة ؟ ازاي ؟
بالفرش، وتجهيزات النيش، والمطبخ؟!!
واللا جاهزة واقفه على رجلك وعندك تكافؤ فى القوى ما تضطريش تقبلى حاجة انتى مش عايزاها، قادرة توزني العلاقة وتظبطي قواعد المعاملة وتبني بيت واسره أساسها قوي علشان تقدروا تواجههوا الحياة،لأن الأشياء مستهلكة لكن البني آدمين أهم.. للاستمرار والاستقرار لازم الطرفين يستوعبوا بعض الاهتمام بتفاصيل العلاقه والحفاظ عليها.. المساندة والمثابرة من أجل القادم
عواميد الحب الأربعة (الاحترام- والاحتواء- والأمان والاهتمام)، أهم أركان العلاقه السليمة
عرفتوا بقى؛ ليه رأيي ان الجواز مش بطيخة مقفولة
الجواز مقدمات منطقية تؤدى إلى نتائج منطقية.
