مواقع التواصل

منتدى شباب العالم  (بقلم: منى فؤاد- مصر)

شهد فخامة الرئيس عبد الفتاح السيسى إفتتاح فعاليات منتدى شباب العالم بشرم الشيخ.. وهو منصة فعالة أسسها مجموعة من الشباب المصري الواعد ليرسل رسالة سلام إلى العالم؛ حيث شارك فيها شباب من 196 دولة فى مَحفل ثري مُشرف؛ للتعبير عن أرائهم والخروج بتوصيات ومبادرات فعالة للعالم.

حدث يلفت انتباه العالم يقوم به مجموعة من خِيرَة شباب مصر؛ لتظهر أُم الدنيا أمام الكون كله بأنها دولة آمنة بدون إرهاب؛ خالية من التطرف، خالية من الحروب الطائفية؛ تُظهر الشعب المصري بأنه شعب متحضر وواعي بكل مجريات الأمور على الساحة السياسية والاجتماعية.

تحدث رئيس الجمهورية في منتدي الشباب في كل ما يخص الشأن الداخلي؛ اللي هو محدش ليه دعوة بمصر وشعبها، ومحدش يتدخل في شؤون مصر، ومحدش هيخاف عليها اكتر مننا؛ أي المصريين والحكومة.

قالها صريحة: إنتوا هتخافوا علينا أكتر مننا؟.

كانت رسالة واضحة وقاطعة للعالم اللي بيحاول يحط مصر في مكانة دول العالم المتخلف، واللي حاطين مناخيرهم في مصر وشأنها الداخلي.

كان ده رد رئيس الجمهورية على سؤال لشاب أجنبي:

إلى متى ستستمر التجاوزات ضد الشعب من إختفاء قصري وانتهاك لحقوق الإنسان؟

كان الرد: انا مبخودتش بالكلام المُرسل؛ هاتلي أرقام وإحصائيات….كابسة

في الوقت اللي رئيس الدولة بيحط مصر في مكانة عالمية عالية؛ هو نفس الوقت اللي البعض من الشعب المصري بيهاجم ويشجب ويدين الدولة المصرية بدوسة زر على السوشيال ميديا بنشر بعض الحوادث والكوارث اللي بتحصل في العالم كله وحتى في الدول المتقدمة

شعب متسلط على نفسه.

قالك البعض: أطفال بتغرق وشباب بيرقص في شرم الشيخ.

والبعض الآخر: منتدي كله كذب وشوية صور وهمية علشان تبين إن مصر خالية من الفقر والجوع، والمرض

وكتب البعض: الحكومة بتلم من الشعب ضرائب على النفس اللي بنتنفسه علشان تعمل مؤتمرات تلم فيها أبناء كبرات البلد علشان يفسحوهم على حسابنا.

طب والنبي ده اسمه كلام حد يصدقه؟

بعض الأغنياء قالك: أنه شال الدعم من الفقراء علشان يتمنظر قدام العالم بالفلوس اللي بيوفرها منهم

وقال أحدهم: مؤتمر متكلف ملايين، والشعب بياكل من الزبالة؛ مش الفقراء كانوا أولى بالملايين دي؟

تخيلوا ان كل الناس دي بنعتبرهم ناس متعلمة مثقفة وبعضهم دكاترة ومهندسين ومدرسين وفي مراكز مرقوقة.

كم من التويتات والبوستات المقرفة اللي تهدم أي دولة، وتضرب السياحة وتعمل انقلاب وتحط مصر في في مكانة زبالة.

يعني الريس بيشتغل علشان يعملكوا كرامة. وانتوا عاوزين تفضلوا تجروا في المكان.

ليه مش شايفين النص المليان من الكوباية؟

ماهو مش كل واحد يمر بضيق أو تجربة شخصية يلعن البلد وحاكمها.

اللي مش عاجبه البلد يمشي منها وسيبونا احنا اللي بنطبل على حد قولكم نعمرها. وساعتها هتتمنى ترجع تاني علشان تعيش في خيرها.

عاجبني الريس أنه ماشي زي القطر، ومش بيسمع للتفاهات، ولا بيهتم بالتافهين اللي مش فاهمين هو بيعمل إيه لمصر وشعبها.

عارفة إني هتشتهم وهيطلعوني مش بس بطبل؛ لا ده هيخلوني باعزف على كل الألات الموسيقية للنظام

حد هيعزف معايا ولا هعزف لوحدي؟

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى