نفسك فى أيه يا ابني
ياحته من لحمي .. ودمي
عايز لبن العصفور أجبهولك
ولا فص من كبدي
عايز أشوفك سعيد ومتهني
أحسن من الكل .. ومني
عايز يا ابويا لو غلطت تسامحني
وتنصحني وقت اللزوم
عايزك تكون صاحبي الحقيقي
فى عز الضلمة .. والغيوم
عايز ارفع راسك بين الناس
وتمشي تتباهى بضناك
عايز الخلق تدعيلي
تسلم .. ويسلم اللي رباك
عايز أعيش من غير خوف
ومن بلاوي الزمن أرتاح
عايز أشوف إخواتي سعدا
لا تكسرهم موجة .. ولا رياح
مالك يا ايويا رحت فين
معاك يا ولدي .. ومبسوط
كمل أحلامك .. وفرحني
كلامك زين .. ومظبوط
عايز البلد دى أحسن بلد
من غير فساد .. وخيانة
عايز الضمير من غربته يرجع
يصحي ناس ف الوحل غرقانة
عايز قلوب صافية مش فالصو
والصاحب لصاحبه يكون أصيل
بصمته فى حزنه قبل فرحه
من غير مصالح .. ولا تمثيل
عايز مهن فيها رحمة
مش سوق جزارين
يرحموا الناس الغلابة
لا الجتة اتهرت سكاكين
عايز قلوب صافية .. وبريئة
تعوضنا سنين جراح
لا يخزنوا قوت غلابة
ولا يسرقوا مننا أفراح
عايز تجارة مش سرقة
عينى عينك في عز النهار
عايز رزق يكون حلال
يجلب خير مش دمار
عايز تنوير .. وثقافة
وكلمة حق .. ولا يخفش
عايز إعلام درع .. وسيف
لو حتى الفاسد وحش
عايز طيبة .. وقناعة زمان
وضحكة صافية وبال رايق
لا فتن .. ولا إشاعات .. ولا حقد
عايز سعادة كل الخلايق
