كعادة اللي ميتسموا اللهم احفظنا اللجان الإلكترونية المملوكة للجماعة المحظورة؛ يراقبون مستجدات ما يحدث في الدولة، ويدخلوا يعملوا تويتات وبوستات تنمر علي الحدث حتي يفقد الشعب ثقته في المسؤلين، وإحنا مش مدركين خططهم القذرة لهدم الدولة.
نالت وزيرة الصحة الدكتورة هالة زايد قسطًا لا بأس به من التنمر والسخرية.. أصبحت منذ ظهور فيروس كورونا تريند علي مواقع التواصل الإجتماعي لدرجة ان مفيش نكتة كانت بتتقال غير لما تكون عليها.
لما سافرت الوزيرة الصين؛ كل الشعب اتريق عليها.
اللي قالك راحت تجيبلنا شحنة فيروسات..
واللي يقولك يللا خلينا نخلص منها أهي راحت للوباء برجليها.. اللهم اضرب الظالمين بالظالمين.
بدأت تويتة أن الوزيرة مطلعة مناخيرها من الكمامة؛ علي أساس ان الشعب كله بقى دكاترة وبيفهم اكتر من وزيرة الصحة.
تلاقي الراجل بتاع التين الشوكي واقف علي العربية بيتريق علي مناخير وزيرة الصحة اللي خارجة من الكمامة والجاهل والمتعلم رأيهم واحد مفيش فرق
وبقى اللي مش بيتنمر علي هالة في الوقت ده
يبقى جاهل ومش متابع للاحداث ويبقى تريقة الناس!!
اللجان بتلعبها صح واحنا بنشربها صح برضه
بالرغم إننا عارفين أن الدولة لها متربصين بها؛ لكن بنساعدهم في الهدم بكل الطرق
حد فاكر اللواء عبد العاطي اللي سمناه عبد العاطي كفتة؟
الراجل ده اخترع جهاز عجيب يعالج الإيدز وأمراض كتير منها التهاب الكبد الفيروسي، قامت المحظورة بتشويهه وسموه (عبد العاطي كفته)!!
وكان تريند جامد أوي أيامها واتعملت برامج كاملة للتهكم علي هذا العالم الجليل
لكن اختراعه طلع حقيقي تخيلوا؟
نرجع لموضوع سفر الوزيرة للصين.
افتكر ظهر سبب سفرها لما وصلت أول شحنة من الفيروسات.. قصدي لقاح فيروس كرونا، وَنبقى أول بلد في أفريقيا تحصل على تطعيمات الفيروس اللاعين ده.
انت لازم تفهم أن حكومتك ورئيسك واعيين ومدركين وعارفين بيعملوا إيه ؛ يعني مفيش حاجة بتمشى اعتباطًا وعشوائي، وأنت بقى اللي جاي توجههم يعملوا ايه مصر دولة قوية ومش بيهزها الشائعات ولا التريندات يا تافه منك له.
شكرا دكتورة هالة زايد؛ لقد قمتِ بدورك علي اكمل وجه في مواجهة الأزمة دون ان تلتفتي للتافهين الهادمين؛ شكرا لرئيس الجمهورية علي اختياره لكوادر عظيمة تتحمل أعباء الأزمات دون أن تكل أو تمل او تُحبط
رعى الله مصر وحكومتها ورئيسها
دكتورة هالة استقبلت أول شحنة تطعيم من الصين تكفي 4 ملايين شخص، فيه شحنات تاني جاية علي فكرة
لأنه فيه تريند شغال أهو إنهم جايبين أربعة ملايين جرعة علي قدهم هما والأغنياء ورجال الأعمال علشان هما اللي يعيشوا ويأسسوا دولة قوية غنية مفيهاش فقراء وباقي الشعب بموت ويبتدوا علي نظافة
ودي كانت آخر تريندات اللجان الإلكترونية !!
