الجنس الناعم

غرام الأفاعي !!

صراع جديد من نوعه بين الستات والرجالة بعد جائحة كورونا !!

شارع الصحافة/ كتبت- منى فؤاد:

منذ بداية الخليقة والرجل والمرأة في صراع ملهوش أهل يسألوا عليه.. دائما شد وجذب بين الطرفين؛ مين السبب في سقوط الإنسان من الجنة؟ كل واحد فيهم يكيل اتهامات للآخر إنه السبب في وجودنا بهذا الوضع علي الأرض وطردنا من الجنة، واتبهدلت التفاحة بين إن حوا هي اللي إدته التفاحة، وأن آدم طفس وأكل التفاحة، ولم تظهر الحقيقة بعد، ولا يزال البحث جاريًا.

بدأت جائحة كورونا وبدأنا في صراع جديد من نوعه الستات يقولك عدد الإصابة في الرجال أكتر مننا، والرجاله يقولولك احنا عدد إصابتنا بالفيروس أقل من الستات وبقوا يعملوا إحصائيات مالهاش علاقة بالواقع؛ كل واحد علي حسب علاقته بمراته وعلاقتها بجوزها وكده يعني، قال بينتقموا من بعض، وللسبب ده بدأت الناس تداري وتخبي إنها مُصابة علشان الشماتة وكده.

بدأت بوستات وتويتات التريقة من الطرفين علي بعض؛ فكرني بالأهلي لما بيحفّل علي الزمالك.

قريت تويتة واحدة بتقولك: عاوزين متبرعة يكون عندها كرونا تجمع أكبر عدد من الرجالة الخاينين وتعمل معاهم الدنيئة علشان ياخدوا العدوى ونخلص منهم، ومقولكوش بقى علي تعليقات الستات؛ كلهم أبدوا استعدادهم للتضحية وعاوزين يبقوا مجاهدات في سبيل القضية.

إيه الغل ده؟!!

واحد كان كاتب بيقول: تعالوا يا رجالة نتفق مع بعض في وقت واحد ندي ستاتنا فلوس ونقولهم انزلوا اعملوا شوبنج ونعمل الدعوة موحدة علي السوشيال ميديا والستات ينزلوا في وقت واحد والمحلات تبقى مكتظة وزحام غير عادي ويعدوا بعض بـ الكورونا خلينا نخلص منهم !!

مقولكوش برضه علي التعليقات من الستات

احنا مستعدين يجلنا كورونا بس هاتوا فلوس ننزل نعمل شوبنج ونجيبلكوا الكورونا ونيجي نطبطب وندلع.

 واحده علقت وقالت احنا المناعة عندنا قوية

هنروح نعمل شوبنج ونيجي حاملين الفيرس ونرجع نظبطكوا

إيه الغل ده برضه؟

لقاح كورونا وصل مصر كدفعة أولى، واتفرجوا بقى علي البوستات بتاعة الذكور والإناث المصريين.

واحدة تقولك: إحنا نجرب اللقاحات دي علي الرجالة الأول؛ لو نجحت يبقى عادي احنا أخذنا علي المرمطة.. ولو فشلت نبقى خلصنا منهم ونعملهم مقابر جماعية!!

واحد كتب: فرصة نحقن الستات بالتطعيمات اللي جت دي لأنه مؤكد لقاحات مضروبة، ونديها لستات مصر ونخلص منهم ونرجع بقى احنا الجنة مكاننا الأصلي.

واحدة كاتبة: خدوا بالكوا يا ستات التطعيمات اللي جاية دي فيها هرمونات ذكورة لو خدتيها هيطلعلك دقن وشنب وحاجات تانية، والرجالة لو خدوها هيبقوا

كل راجل فيهم طويل الناب أسد الغاب.

وبقت صراعات كوميدية في شكلها الظاهري، ولكنها تنم عن ما بداخل نفس كل طرف للآخر.

 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى