كلامك كان بيعجبني
و صوتك كان بيشجيني
و حاضر كنت بعشقها
و كنتي جوا تكويني
و فاكر ضحكة كت منك
بتحلي الدنيا و حياتي
و عصفور كان على غصنك
بيعزف لحن بياتي
حاجات و حاجات كتير جدا
و حنيّة و كلام طيّب
و خُد بالك عشان خاطري
بلاش تغلط فتتعيب
مسكتي ايديا و مشيتي
و قلتي يشوفوا إيه يعني
حبيبي و كلهم عرفوا
و مين يقدر يرجّعني
زرعتي الحلم جوايا
و طبطبتي على أملي
فخليتي الحياة بسمة
و من حبك حسن عملي
بقيت اسأل على الغايب
و اطبطب ع اللي كان مجروح
و أمد ايديا للعايز
و افرق ضحكة فين ما باروح
مشيتي ازاي كدا فجأة
و قفلتي البيبان بينّا
فشمتّي العِدا فيّا
و زعّلتي اللي حبينا
ما عدتيش للصفا عاشقة
كما كنتي و انا شاهد
و جايبة اللوم على صدقي
بقيتي حابة نتناهد
فلو نبض نده مرة
بحق الحب ناديني
هادوس على الجرح و اجيلك
و اجيلك جري على عيني
