كل ال باقي منك
كلمتين في أجندتي
كلمتين باقين بخطك
هما دولت دنيتي
كل ما أشتاقلك
أزورهم
وأعتبرهم صحبتي
وأحكي وياهم وأقولهم
وف كلامي شكوتي
كلمتين هما ال فضلو
نور خطايا ف غُربتي
وانت عارف آسيّة الليالي
إنت داري بوحدتي
طول حياتي
مليش صحاب
غير قلم
وأجندة تحت مخدتي
وف عيوني لما أنام
تيجي كلمة ف دمعتي
أصحى أنا من عِز نومي
عشان قصيدتي وغنوتي
مرة بحكي عن حياه
وكتير أقول عن قهرتي
عن عيون عاشقة الوجود
وقلب قتلاه لوعتي
عن زمان راح من زمان
عن حبايب عن جيران
كلهم هنا موجودين
فى حبر قلمي ف كلمتى
ويا الورق بين السطور
بلاقي روحي
مليش ونيس أنا ف الوجود
غيرهم يا روحي
تنهيدة بتبان في الكلام
سكينة ساكنة في الآلام
ومن الهموم أنا مش بنام
وبلقى نفسي وأحس بيها
أول ما بكتب وابتدي
بكلمتين في أجندتي
