ما تهدِّي يا عم و تسيبك
من الفكر اللي ماله مآل
و لا بيوصل لناس فاهمة
و لا بيعدل ف يوم أحوال
ما هي يا سيدنا بمزاجهم
و على كيفهم مطاوعاهم
شمال تمشي.. يمين تمشي
و طوعهم أصلها معاهم
بتشغل ليه كدا بالك
و دايما للهموم شايل
بتوجع ليه دماغ روحك
و ليه على ناس بتتحايل
أنا لو كنت يوم انت
لقلت نسيتها… جت سهوة
أعيش مرتاح ف دنيا براح
و اقضي العمر ع القهوة
ما بين أحباب عجاز وشباب
وقابلينها كما تيجي
لا راحت فين و جاية منين
و رُص الشيشة يا مليجي
و قهوة زيادة واتوصّى
و سحلب للي جاي جديد
و حتة فحم ولهانة
تشعلل لي المزاج و تقيد
و بكره ان جاني راح اعيشه
و هاتصاحب عليه و اعيش
يكون ما يكون ماهيش فارقة
و عادي هاعيشها لو ما يجيش
يا عم الحاج ارحمنا
و سيب ربك يعدلها
دي ناس ياما كتير حواليك
و قالوا عليك مبهدلها !!
