أدب وثقافة

الشاعر فهمي علي يكتب: هاحاول أفهَم الفولة.. واشوف الدنيا زَيِّيهُم!!

هاحاول أفهَم الفولة

واشوف الدنيا زَيِّيهُم

يجوز اعرف أكون منهُم

والِم الغلَّة واساويهم

أفُك الحَبل من إيدي

فتِطوَل عَ الِّلي مش مَسموح

أدوس علي كلمتي وانسىٰ

أهرتِل وادبَح المدبوح

أنا هاسرق كلام لنِزار

ومِ الأبنودي ويَّا جاهين

أظبَّط كام ديوان فاصبَح

كبير شُعرا ومَلوِ العين

أبان عَ الشاشة مع كلُّه

واطبِّل وابقىٰ تَختَراوان

اقول المُر دا معسِّل

وإن الضلمة مش توَهان

أكيد هاعزِمكوا على ندوة

عشان مليانة بالبشاوات

واصُب لكُم كتير قهوة

واعايركُم بكل ما فات

مش اديتَك زمان حرفين

وكام قافية وبيت موزون

وعلِّمتَك تجيب معنىٰ

لنص كئيب فصار مجنون

هاخلِّي الناس تِصدقني

وتحلِف إن انا أستاذ

واجيب لي محامي يِشبهني

ما هوُ ممكن في يوم يِتعاز

ما دام قتَّايَة مَحلولة

وسايبَة للِّي بَس يطول

فأنا بشياكة هانهَبها

ما انا أصلًا مانيش مَسئول

ولو مرَّة هَتحتاجني

وقد كُنا في يوم أصحاب

تعالىٰ  عَندي.. أبِّجني

وانا افتحلَك جميع لابواب

وهاقضيلك جميع شُغلَك

وافوت فِ حيطان حَجر صوان

ما هي فُولة وانا بيها

هاكون سِيد الِّلي عاش إنسان

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى