و… لسه حلمي
طفل على كتفي
ألف بلادي شيلاه…
و أعود تاه مني في الزحمة
و أبات أسأل وما ألقاه
و أعود دمعي
على خدي
أناجي حلم جواه
و أعيش الحلم من تاني
و أعيش أدادي في أمالي
و ألف وأدور في كل مكان
و أرجع خالية يا بلادي
وأبات يامصر على بابك
وأجري بهمة في رحابك
أساوى شعركِ الغجري
و أنفض غبار جلبابك
و أمسح دمعكِ المسكوب
ما أنا في حبك يا بلدي بدوب
و.. وسط الضلمة والعتمة
أشوف طيفك طبق فضة
وفين أروح وفين ألقاه
وقلبي ما بين السكرة والسكرة
أسير حبك..
أسير ناسك…
وما بيرويني غير كاسك
بحبك بقوام ممشوق
و أد الحيرة أد الشوق
دا اِنتي الدم في عروقي
وإنت الروح اللى بتسري
و اِنت غروبي و شروقي
يا بنتي وأمي يا حبيبتي
وكل ما فيكِ من عيلتي
يا فجر لاجل بلادي عود
دي مصر جميلة بعيون سود
سماها صافية خدودها ورود
ونيل فياض بيحضنها
وقلوب عاشقة فدى عيونها
