أقلام القراء

أسرار العلاقات الناجحة والشافية (بقلم: شيماء قنديل)

 الحياة علاقات … الحياة بين البشر علاقات وعلشان العلاقة تنجح لازم يكون فيها أخد وعطا مش طرف يعطي والتاني ياخد وبس يعني تاخد حب تدي حب تاخد اهتمام واحتواء تهتم وتحتوي بالطرف الآخر بلاش علاقات الاستغلال والاستنزاف والابتزاز للمشاعر والطاقة بلاش علاقات عقيمة ومريضة بينتج عنها تصرفات مشوهه وبيخرج منها أشباه بني ادمين معدومي الثقة في الآخرين وبيفقدوا إتزانهم النفسي والعاطفي.

 في مبدأ العلاقات؛ قالَ الشافعي: زِنْ من وزنَك بما وزنَك، وما وزنَك به فَزنهُ، من جاءَ إليّك فَـ رُح إليّه، ومن جَفاك فصُد عنهُ … ! علاقة صحيحة واحدة فى حياتك كفيلة تشفى سنين تعب وغربة وتوهه في الحياة. المودة والحب بين البشر قوة شافية ربنا بيرسلنا لبعض رحمات وفي الوقت المناسب زي الرزق بالظبط … الرزق الحلو بيدفعنا لقدام وبيهمس لنا بدعوة من قلبه بيضمنا بكلمة وبيحتوينا بنظرة .

 فيه ناس بتدخل حياة ناس بالصدفة البحتة وتغيرها بكلمة بتبطب، بحضن بيطمن، بقلب بيحن، بلين في المعاملة، ورقة في المشاعر تخلي الحجر يلين …. في ناس بمجرد ما بتسمع صوتها أو تشوف بسمتها يومك بيضحك وصباحك بيحلو …. في ناس مجرد حوارك معاها بيخليك مطمن يخليك تقول يا ريتني عرفته من زمان في حاجة اسمها علاقات شافية يعني أعرف فلان يخليني بكلمة منه سعيد وفرحان أفتحله قلبي وأفضفض معاه، واحكيله سر تاعبني من غير ما أعرف أنا بحكيله ليه هو أنا ارتحت فحكيت ومش خايف إني حكيت علشان انا مطمن له وقلبي ارتاحله البني آدم مهما كانت قوته وغطرسته هو في الآخر بشر مش آلة جامدة ما بتحسش !!

 

بشر محتاج لعلاقة أو علاقات شافية علشان يتغيروا بصدق ويكونوا أحسن. تبادل مشاعر الحبِّ والمودة مع الطرف الآخر دواء شافي ما بيوصفوش طبيب لكن تعالجه علاقة شافية فيها حب ومودة وسند. ربنا هو السند وخلق السند في الدنيا فى صورة علاقات بينا بنشوفها فى حنية أب وأم ، في عطف الأخوات، في مودة ورحمة بين زوج وزوجة، في صاحب جدع وقت الشدة ضهر وسند.

العلاقة الناجحة والشافية ملهاش غير معيار واحد هو إنك تكون فيها مبسوط وفرحان ومتقدم فى حياتك.. علاقة بتحولك من شخص مهزوم وضعيف لشخص ناجح وقوى ومقبل ع الحياة بتخليك شخص أفضل من الشخص بتاع امبارح، ولو حسيت أنك متقيد ومخنوق وبترجع لورا خطوات مش بتتقدم ومش مرتاح فى علاقة بينك وبين حد اهرب واجرى وسيبها قبل ما هى تسيبك وتكون سايبة جواك علامة وجرح. خلوا العلاقات بينكم وبين بعض علاقات شافية..ما توجعش ولا تكسر.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى