مش هسافر تاني يامَّه !! (كلمات: فاطمة فاروق- مصر)

ليه يا بحر الموج يا عالي..

ليه بتبلع على طول آمالي__

ليه يا بحر طلعْت قاسي..

عُمري كله ف المآسي__

لما حظّي بين أهلي ضاع..

قولت أجرّب بَختي برَّه__

قولت اسيبها عِيشة مُرّة..

والهجرة يعني مش مَعرَّة_

فترة وارجع تاني ليها..

هيه المغامرة كات مُضرَّة__

وارجع لأمي وابوس إيديها

*******

فجأة حصلت موجة عالية..

والجحيم من كل ناحية،،

وال تبكي وال يصرخ..

وال روحها طِلعت ف ثانية!!

*****

سامحيني يامَّه ياغالية..

كان نفسي أذوَّقك السعادة،،

رجعوني لبلدي جثة..

وانتي يامَّه كُنتِ حاسة!!

مش هسافر تاني يامَّه

رغم إن العدل مات

لسه برضو ليّه حاجة..

وشيء جميل من ذكريات!!