دافع 30 صاغ في المخروبة دي !! (بقلم: منى فؤاد- مصر)

مشهد عبقري من مسرحية (الأستاذ) فؤاد المهندس ولما تيجي سيرة فؤاد المهندس لازم يسبقها لقب أستاذ.. مسرحية السكرتير الفني؛ كان هو بطل المسرحية، طالع بدور مُدرس، وكعادة الدرامة المصرية يجسدون المعلم تعيس.. هُزُء؛ لابس بدلة مزيتة وبنطلونها قصير وشراب مدلدل وذقنه طويلة ولازم يوصلك انها مهنة المعفنين.

يظهر الأستاذ ياقوت أفندي مدرس ابتدائي في مشهد في المدرسة بهيئته الساخرة كمُعَلم أمام المَعَلم دسوقي بتاع السمك وهو بيقوله:
الأرض تدور حول نفسها.. لذا يتعاقب الليل والنهار
الأرض تدور حول نفسها ازاي يا يافندي؟
يعني الدكان بتاعي في باب الشعرية أصحى الصبح الاقيه في روض الفرج؟
الأرض تدور حول نفسها إزاي يا جاموس ولابس بدلة؟
بقى أنا أدفع ثلاثين صاغ في المخروبة دي علشان تبوظوا عقل الواد وتقولوله الأرض تدور حول نفسها؟

بياع السمك إدى لنفسه الحق أنه يشتم المدرس ويقوله يا جاموس ولابس بدلة
أصله دافع ثلاثين صاغ بحالهم، ومن هنا بدأت تضيع قيمة المعلم بأحساس ولي الأمر أنه بيدفعله ومن حقه يتحكم فيه حتى في طريقة تدريسه لابنه.

هكذا يتعامل ولي الأمر مع معلم الأجيال حتى الآن؛ يتحكم في العملية التعليمية بالثلاثين صاغ بتوعه، ورايح جاي يهين فيه تحت حس الثلاثين صاغ وكأنه اشتراه من سوق النخاسة.

تمر العملية التعليمية بأزمة عالمية بسبب كورونا.. ويصدر وزير التربية والتعليم عدة قرارات كلها تصب لصالح التلميذ حفاظًا عليه، ولأننا شعب يهاب ويرتعب من التغير ومن كل جديد استشاط ولي الأمر وبدأ يصول ويجول ويكتب علي السوشيال ميديا؛ يسقط وزير التربية والتعليم..
دافعين مصاريف المدرسة وثمن الكُتب وفلوس الباص وفي الآخر الوزير يقفل المدارس؟
إزاي تقفلوا المدارس وإحنا دافعين ثلاثين صاغ في المخروبة دي؟
عاوزين بضاعة بفلوسهم طبعا
يدفعوا فلوس يعني عاوزين يرتاحوا من وجع دماغ العيال طول اليوم.

يجتمع الماميز علي الجروب بتاعهم ويهروا وينكتوا علي الثلاثين صاغ اللي اتدفعوا في المخروبة، ويفعلوا الهشتاج #يسقطوزيرالتعليم
طب لو رجعلكوا الثلاثين صاغ هتتراجعوا عن تفعيل الهشتاج وميبقاش تريند؟

شيء محزن لما الدولة تبقى بتدير الأزمة بأحترافية ويجوا شوية نسوان فاضية يشتموا في الوزير والمعلم علشان بيحاولوا يحجموا الأزمة.

بعد إعلان سيادة الوزير بأخر المستجدات، وطريقة إمتحان الطلاب؛ هاتك يا تريقة ومسخرة
واستهزاء، وهما مش فاهمين أي حاجة؛ لكن إزاي ؟
إزاي يقولوا انهم مش فاهمين؟
يطلع كل واحد في الشعب خبير في طريقة ادارة الأزمات
ماهو من حقه يتكلم بالثلاثين صاغ اللي دافعها في المخروبة دي.

______________________

بقلم/منى فؤاد