مواقع التواصل

علاقات شافية.. ما توجعش ولا تكسرش !! (بقلم: د. شيماء قنديل- مصر)

الحياة علاقات … الحياة بين البشر علاقات وعلشان العلاقة تنجح لازم يكون فيها أخد وعطا مش طرف يعطى والتاني ياخد وبس.. يعنى تاخد حب تدي حب تاخد اهتمام واحتواء تهتم وتحتوي الطرف الآخر.

   بلاش علاقات الاستغلال والاستنزاف والابتزاز للمشاعر والطاقة بلاش.. علاقات عقيمة ومريضة بينتج عنها تصرفات مشوهة، وبيخرج منها أشباه بنى آدمين معدومي الثقة في الآخرين وبيفقدوا إتزانهم النفسي والعاطفي.

في مبدأ العلاقات، قالَ الشافعي:

زِنْ من وزنَك بما وزنَك ، وما وزنَك به فَزنهُ، من جاءَ إليّك فَـ رُح إليّه، ومن جَفاك فصُد عنهُ … !

علاقة صحيحة واحدة فى حياتك كفيلة تشفى سنين تعب وغربة وتوهة في الحياة.. المودة والحب بين البشر قوة شافية ربنا بيرسلنا لبعض رحمات وفي الوقت المناسب زي الرزق بالظبط.

  الرزق الحلو بيدفعنا لقدام وبيهمس لنا بدعوة من قلبه بيضمنا بكلمة وبيحتوينا بنظرة … فى ناس بتدخل حياة ناس بالصدفة البحته وتغيرها بكلمة بتبطب، بحضن بيطمن، بقلب بيحن، بلين فى المعاملة، ورقة فى المشاعر تخلى الحجر يلين …. فى ناس بمجرد ما بتسمع صوتها أو تشوف بسمتها يومك بيضحك وصباحك بيحلو …. فى ناس مجرد حوارك معاها بيخليك مطمن يخليك تقول يا ريتنى عرفته من زمان فى حاجة اسمها علاقات شافية

يعنى أعرف فلان يخلينى بكلمة منه سعيد وفرحان أفتحله قلبى وأفضفض معاه واحكيله سر تعابنى من غير ما أعرف أنا بحكيله ليه هو أنا ارتحت فحكيت ومش خايف إنى حكيت علشان انا مطمن له وقلبى ارتاحله.

البنى آدم مهمها كانت قوته وغطرسته هو فى الآخر بشر مش آلة جامدة ما بتحسش … بشر محتاج لعلاقة أو علاقات شافية علشان يتغيروا بصدق ويكونوا أحسن.

  تبادل مشاعر الحبِّ والمودة مع الطرف الآخر دواء شافي ما بيوصفوش طبيب، لكن تعالجه علاقة شافية فيها حب ومودة وسند.

ربنا هو السند وخلق السند فى الدنيا فى صورة علاقات بينا بنشوفها في حنية أب وأم، في عطف الأخوات، فى مودة ورحمة بين زوج وزوجة، في صاحب جدع وقت الشدة ضهر وسند.

العلاقة الناجحة والشافية ملهاش غير معيار واحد هي أنك تكون فيها مبسوط وفرحان ومتقدم في حياتك علاقة بتحولك من شخص مهزوم وضعيف لشخص ناجح وقوى ومقبل على الحياة بتخليك شخص أفضل من الشخص بتاع امبارح ولو حسيت أنك متقيد ومخنوق وبترجع لورا خطوات مش بتتقدم ومش مرتاح فى علاقة بينك وبين حد اهرب واجرى وسيبها قبل ما هى تسيبك وتكون سايبة جواك علامة وجرح.

خلوا العلاقات بينكم وبين بعض علاقات شافية..ما توجعش ولا تكسر.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى