أول كلامه زمان
كان حلو متنقي
اختار كلام م القديم
و اداني بيه حقي
سرد الحروف كلها
و اتوصي بالطيب
فشربت كأس معتبر
خلاني متغيب
لفت ليلى و بقى
وسط البشر معدود
صوته بقى متسمع
ف فرد عليا العود
نسي اللي كان و افترا
داس ع الجميل و نساه
رجعني تاني لورا
فتعبت.. قلت الآه
الجرح نازف و انا
لساني متحمل
اليوم يعدي بسنة
و صبرت و باكمل
لكن و رب السما
و محمد الغالي
أصبحت أنا مش أنا
ما اعرفش إيه… مالي
بكفاية… لأ مش كدا
ملعون أبو الطيبة
حبستني جوا الوجع
و الحسرة… بلا خيبة!!
