عيني ليه دايما
ما تفارق الابتسام
جوه قلبي نبض ناطق م الآلام
بس صوته ليه ضعيف
صرخة جوايا ما تخرج
نفسي تطلع نفسي ترفض
تبقى حاجة مسلمة
من غير كلام
شوفت إيه منك يا دنيا
غير عذاب وجراح كثيرة
وأما أقول تطيب جراحي
اتصدم صدمة كبيرة
كل حاجة رايحة منا
لسه إيه باقي ف زمانا
افتكر وانا لسه طفلة
كنت بحلم
إني أكبر وابقى زي
أعلى نجمة
كنت دايما شايفة النجوم
حلم وبعيد.. كنت أقول
راح ييجي يوم
يكون فيه عيد
أصل عيدي كان حزين
مات ابويه وسابني فيه
وبعد منه ما شوفت عيد
كل ضحكة اتبدلت دمع
وقال يقولوا عيد سعيد
بس ما في حاجة باقية
زي ما اهي
إلا إحساسي الوحيد
إن ويا كل فرحة
حزن ساكن في الوريد
حتى روحي مش دي روحي
منى راحت عني تاهت
وبقيت شريد
و يا أيامي بغرب خطوتي
وف بلاد الغربة تاهت سكتي
وأقول أدور من جديد
واتقابلنا
زي ليل عاشق نهاره
بس كل واحد
في اتجاه تاني وحيد
عمرهم ما اتلاقوا أبدا
بس بينهم شيء أكيد!!
