أمانك النفسي !! (بقلم: د. أماني الشعراوي- مصر)

حدودك الشخصية هي اللي بتعمل التوازن النفسي الداخلي فتعاملاتك المحيطة… بس خليك عارف إن:

1-  في فرق بين حدود شخصيتك المرسومة في إطار منطقي وبأصول وأعراف متعارف عليها، وبين إنك تلغي حدود غيرك وتتعداها بنفس الطريقه اللي أصلا مش هترضيك لو انعكست عليك، وهتخترق مساحة أمانك الشخصي.

2-  مايخدكش العشم خصوصا فالعلاقات القريبة سواء بين الأهل والأسرة الواحدة أو الأصدقاء أو حتى بين الزوجين أن يتم الضغط عليك نفسيا فتبتز عاطفيا وتسوء حالتك النفسية، لمجرد أن الطرف الآخر حابب يفرض سيطرته عليك زي شبكة العنكبوت ويعملك شرنقة يحطك فيها … وقتها حط عليه وعلى أهله مش عافية هي وبالسلامة أي علاقة مهما كان قربها تسببلك طول الوقت تعب نفسي العلاقات اتخلقت علشان يسود فيها الاحترام والود وكل واحد (لو قدر)

يساعد فيساعد لأننا مخلوقين (نعين ونكمل بعض) مش مخلوقين نعيش علشان حد تاني ولا إن معاليك ترضي عن حد.

3- رأيك فيّا متوقف علي حدود تفكيرك المتواضع المرتبط بأسلوب تربيتك ونشأتك وخبراتك فالحياة وقلبك من جوه أسود ولا برتقاني وتدينك وفهمه ومقدار ما يربط بينا من مصلحة حياتية هتفيدك ولا هتضرك وكوووول دول لا يعني اللي قدامك فشيء إنك تصدر عليه حكم قد يؤذية نفسيا وساعتها استحمل بقي اللي ربنا هيعمله فيك لانه العدل ومفيش حاجه بتضيع عند ربنا.

4- حدود غيرك لو ماجتش على هواك يبقي تبعد بكل أدب واحترام لو انت محترم وبتفهم أصلا يعني إيه احترام من غير تشويه للآخر علشان بس ما عجبش سيادتك.

5- ماتخليش دايما سقف توقعاتك يخدعك ويسول لنفسك إن اللي قدامك طيب ولين فه‍اجي عليه علشان أعوض نقص جوايا يحسسني اني احسن منه ماتتخضش وقتها لمايوقفك عند حدك ويفاجأك بصد لانك انتهكت أمانه النفسي بانك عايز تستغل حق مش حقك أصلا.

من الآخر حافظ علي مساحة حدودك، هتقلل اختراق أمانك النفسي، وتعيش بهدوء.